Hüseynov Yaşar Əhəd oğlu 1981-ci ilin mart ayının 12-də anadan olub.

2014-cü ilin avqust hadisələrində döyüş əməliyyatlarında iştirak edib və bu döyüşdə düşmənin məhv edilməsində fəal iştirak edib. Goranboy rayonunun Gülüstan kəndi yaxınlığında döyüş tapşırığının icrası zamanı ağır yaralanıb, 8 ay müalicədən sonra yenidən xidmətə qayıdıb. 2016-cı ilin aprel döyüşlərində Tapqaraqoyunlu və Talış istiqamətlərində yaxından iştirak edib.

2020-ci il 27 sentyabrdan Vətən müharibəsində Azərbaycan Respublikasının Cəbrayıl, Füzuli rayonlarının və Şuşa şəhərinin işğaldan azad olunmasında yüksək peşəkarlıq göstərmiş, xüsusi rəşadət, şücaət, qəhrəmanlıq və qorxmazlıq nümayiş etdirmişdir. 02.10.2020-ci il tarixində Cəbrayıl rayonunun Böyük Mərcanlı kəndinin və 265 yüksəkliyinin azad olunmasında iştirak etmişdir.

Oktyabr ayının 9-da Füzuli rayonunun Gorazıllı kəndinin azad olunması zamanı odlu silah güllə yarası alaraq xəstəxanaya təxliyyə olunub və müalicə alaraq yenidən döyüşə qayıdıb.

Noyabrın 5-dən 6-na keçən gecə Şuşa şəhərinə daxil olmuş, yaxın təmas döyüşündə xüsusi peşəkarlıq nümayiş etdirmişdir.  

Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 09.12.2020-ci il tarixli Sərəncamına əsasən Yaşar Hüseynova Vətən Müharibəsi Qəhrəmanı adı verildi.

Doğum Günü - 12.03.1981