Mayor Səfərov Elvin Sərraf oğlu 24.10.1992-ci ildə anadan olmuşdur.

Qrup komandiri kimi hər zaman fədakarlığı, məsuliyyəti, dözümlülüyü ilə fərqlənən mayor Səfərov Elvin Vətən Müharibəsinin ilk günlərində öz qrupu ilə birgə Daşkəsən rayonu ərazisində yerləşən Hinaldağ və Ağdağ yüksəkliyi istiqamətində yerləşən düşmən müdafiəsinin yarılması əməliyyatlarında yaxından iştirak etmişdir. Füzuli, Cəbrayıl və Xocavənd rayonu ərazisində gedən döyüş əməliyyatlarına qoşulmuş, Hadrut qəsəbəsinin düşməndən azad olunmasında, qəsəbənin və ətraf ərazilərin düşməndən təmizlənməsində şücaət göstərmişdir.

20 oktyabr 2020-ci ildə mayor Səfərov Elvinin “Vətən” qrupu Müdafiə Nazirliyinin xüsusi təyinatlı dəstəsi ilə birlikdə düşmən arxasına sızmış, Zoğalbulaq, Böyük Tağlar kəndləri istiqamətində 5 km dərinliyə doğru hərəkət etmişdir. 21 oktyabr 2020-ci il tarixdə Zoğalbulaq, Azıx, Böyük Tağlar, Tuğ, Ağdam, Düdükcü kəndlərinin düşməndən azad edilməsində xüsusi fərqlənmiş, başçılıq etdiyi qrupla azad olunan yaşayış məntəqələrinin düşməndən təmizlənməsi əməliyyatlarında  iştirak etmişdir.

26-29 oktyabr 2020-ci il tarixlərdə Taqaverd, Zərdanaşen, Çanaqçı kəndlərinin  düşməndən azad edilməsi əməliyyatında iştirak edərək xüsusi qəhrəmanlıq göstərmişdir.

30 oktyabr 2020-ci il tarixdən mayor Səfərov Elvin oz qrupu ilə Müdafiə Nazirliyinin xüsusi təyinatlı dəstəsi ilə birlikdə Şuşa şəhərinin azad olunması əməliyyatlarına qatılmış, 5 noyabr 2020-ci il tarixdə Laçın yolu və Şuşa şəhəri ətrafındakı yüksəkliklərin ələ keçirilməsində iştirak etmişdir. 7 noyabr 2020-ci il tarixdə Şuşa şəhərinin darvazalarına 500 metr məsafədə yerləşən əsas strateji yüksəkliyin ələ keçirilməsi, digər qrupların şəhərə təhlükəsiz yaxınlaşması təmin edilmişdir. 

Vətən Müharibəsinin gedişatında qəhrəmanlığı yüksək qiymətləndirilən Elvin iki dəfə vaxtından əvvəl hərbi rütbə alaraq müharibəni mayor hərbi rütbəsində başa vurmuşdur. 

Doğum Günü - 24.10.1992