Şəhid Baş Gizir Allahyarov Şahin Hüseynbala oğlu 29.01.1993-cü ildə anadan olmuşdur.

Döyüşçü yoldaşları arasında öz dəsti-xətti ilə seçilən, hər zaman böyük hörmət və ehtirama sahib olan baş gizir Allahyarov Şahin Vətən Müharibəsinin ilk günlərindən  əməliyyat qrupları ilə birgə Daşkəsən rayonu ərazisində yerləşən Hinaldağ istiqamətində keçirilən döyüş əməliyyatlarında yaxından iştirak etmişdir. 

Şahin cəbhənin Füzuli və Cəbrayıl rayonlarının bir sıra yaşayış məntəqələrinin azad olunmasında qəhrəmanlıq göstərmiş, gərgin döyüşlərdə düşmənin xeyli sayda canlı qüvvəsini məhv etmiş, Hadrut qəsəbəsinin azad olunmasında fərqlənmişdir. 

Oktyabr ayının 20-də baş gizir Allahyarov Şahin döyüşçü yoldaşları ilə birlikdə düşmən arxasına sızmış, Zoğalbulaq, Azıx, Böyük Tağlar, Tuğ, Ağdam, Düdükcü kəndlərinin düşməndən azad edilməsi, azad olunmuş yaşayış məntəqələrinin  və ətraf ərazilərin düşməndən təmizlənməsində rəşadət göstərmişdir. 

 Şahinin son döyüşü Şuşa şəhəri uğrunda oldu. Vətən müharibəsinin gedişatında xüsusi əhəmiyyət kəsb edən Şuşa şəhərinin azad olunması cəsur kəşfiyyatçı Şahin Allahyarovun ən böyük arzularından biri idi. Lakin bu onun sonuncu döyüşü oldu. 31 oktyabr 2020-ci il tarixdə Şuşa istiqamətində döyüşlərdə qəhrəmancasına şəhid oldu.

Doğum Günü - 29.01.1993
Anım Günü - 31.10.2020